Um Langanesströnd og nágrenni

Miðfjarðará og Litla-Kverká eru á Langanesströnd, sem svo nefnist. Þar er átt við ströndina frá norðanverðum Finnafirði, um Miðfjörð og Bakkafjörð og þangað sem sveitarfélagsmörk eru við Vopnafjarðarhrepp.

Tveir þéttbýlisstaðir eru í nágrenni árinnar, Þórshöfn og Bakkafjörður og er sá síðarnefndi nær. Þorpið á Bakkafirði er í um 15 km. fjarlægð frá ánni. Byggð hefur verið á Langanesströnd frá landnámi eins og lýst er í Landnámabók. Þorp tók að myndast á Bakkafirði kringum aldamótin 1900 í tengslum við fiskveiðar, vinnslu og verslun. Á Bakkafirði bjuggu í mars 2014 alls 84 íbúar. Þeim hefur smám saman farið fækkandi á umliðnum árum.

Lífið á Bakkafirði snýst að mestu um fiskinn í sjónum og af veiðum á honum hafa margir í þorpinu lífsviðurværi sitt. Á Bakkafirði vinna flestir við eitthvað tengt fiskveiðum, stunda sjómennsku eða vinna í landi við fiskvinnslu eða beitningu. Á Bakkafirði eru eingöngu trilluútgerð og byggjast veiðarnar aðallega á þorski, fyrir utan grásleppuvertíðina á vorin. Hjá stærsta fyrirtækinu starfa um 10-15 manns. Á Bakkafirði eru einnig nokkur fjölskyldufyrirtæki, sem stunda útgerð og fiskvinnslu.

Enn er búskapur í sveitinni, þótt aðeins sé svipur hjá sjón miðað við t.d. miðja síðustu öld. Á Langanesströnd hefur búskapur alla tíð snúist eingöngu um sauðfjárræktun. Hin síðari ár hefur athygli manna m.a. beinst að ræktun annars konar áa, með tekjur af laxveiði í huga, enda þykja aðstæður í Bakkaflóa einstaklega vel til þess fallnar. Í Bakkaá veiddist t.d. stærsti lax, sem veiðst hefur á stöng á Íslandi. Hann mældist 43 pund og 130 cm.